SELMANA del 4 de mayu

¡Bones tardes, llinguaterinos y llinguaterines! 
¿Qué tal lo lleváis? Agora que yá podéis salir una horina a la cai, meyor... 
¿A que sí? 😉

Bono, pues poquiñín a poco yá llegamos al mes de mayu. Déxovos la fueya del calendariu pa que vos sirva pa dir organizándovos. Amás, vien con un trocín de mandala por si lu queréis pintar.

                                                                             *Calendariu de "Imagina, Crea, Educa"

Pues a ello...  

D'esti llunes 4 de mayu hasta'l vienres 8 de mayu, tendríamos que tar festexando la SELMANA de LES LLETRES ASTURIANES.
Esta folixa faise pa celebrar que la nuesa llingua sigui viva y qu'hai muncha lliteratura escrita n'asturianu: cuentos, noveles, cantares, ensayos, teatru, etc...

Pero, como yá sabéis, nesta situación que vivimos nun se pue xuntar muncha xente, asina que se decidió posponelo y pasalo pa la prósima seronda. Equí podéis lleer la noticia:
Aplazada la SELMANA DE LES LLETRES ASTURIANES


TAREA pa TOOS y TOES:
Pa los/les qu'andáis un poco despistaos o despistaes tengo que cuntavos que dientro de la SELMANA DE LES LLETRES ASTURIANES hai un día, el vienres, que se llama: 
El DÍA de les LLETRES ASTURIANES. Esi día ye como "EL DÍA DEL LIBRO", pero de la llingua asturiana. 

¿Yá lo tenéis más claro...?

Asina, que anque la fiesta oficial y tolos festexos que taben previstos (conciertos, conferencies, presentaciones de llibros, teatru, etc...) nun se puedan facer agora, na escuela de XOVE vamos celebralo a la nuesa manera: Faciendo'l CARTEL d'esti añu. Ésta va ser la  primer tarea. 

*El cartel tien que tener, obligatoriamente, un títulu: "Selmana de les Lletres Asturianes" y el númberu de la edición (númberu de veces que se lleva celebrando. Esti añu ye la 41 vegada que se fai). Tolo demás ye llibre...
Podéis usar distintes técniques y mezclales, usar materiales que queráis pegar pa decorar (collage), colorear con ceres, colores de madera, plastidecores, rotuladores, lo que vos preste. A ver qué se vos ocurre...

P'animavos, déxovos esti cantar fechu pal "Día de la Reciella": 
PRÉSTAME POLA VIDA... 

"Préstame pola vida dicítelo n'asturianu,
voi garrate de la mano
y falate a la oreyina..."




TAREA pa 1º, 2º y 3º: 
Yá me cuntó un paxarín qu'estos díes tais faciendo coses interesantes na organización y vida en casa como la compra, la ellaboración de pan o galletes... 
Polo que na segunda tarea vais ver esti vidiu, onde Arián y Llume van enseñavos a facer frixuelos.

RECETA frixuelos

Dempués de velu, vais pensar nun postre que vos guste, ya investigar la receta pa mandámela.
Vais escribila nuna fueya y grabar un audiu cuntándome los pasos qu'hai que siguir na so ellaboración (mandáime les dos coses). 
Como siempres, tenéis que ser curiosinos y curiosines pa que s'entienda bien lo que preparasteis y siguir un orde na receta. 
Déxovos otra receta especial pa que vos ayude:  receta ESPECIAL

A ver qué receta rica preparáis...


TAREA pa 4º y 5º:   
Una de les coses que más presten de toles que se puen facer en Xixón a lo llargo'l añu, que son munches, ye dir al cine. 
Como sabéis, na nuesa ciudá hai un Festival, tolos iviernos, que se llama FICX (Festival Internacional de Cine de Xixón) onde se puen ver pelis y curtios (pelis de poca duración) veníos de tolos llugares del mundiu.

Asina que nesta segunda tarea vamos dir al cine:

1) Destín

2) Los fantásticos llibros esnaladores del sr Morris Lessmore

3) Les pirámides d'Exiptu

4) Cinema

Vamos xugar a que yes un/una periodista del Festival de Cine y éstos son los curtios que viste nel pase previu al que solo tien accesu la prensa. Asina qu'agora tócate informar a la xente (como bon/a periodista que yes) pa que vaya a velos al Festival.

Puedes escoyer mandar "la crónica" (información) escrita o falada nun audiu. Escueyas lo que seya, tienes que facer un esquema o preparación enantes de cuntar de qué va l'argumentu, pero, cuidaoooo, nun vayas facer "spoiler" y fastidiar los finales.
(¡¡¡Alcuérdate, nun ye lo mesmo facer un argumentu qu'un resumen!!!)

¡Ánimu, que lo vas facer perbién!




TAREA pa 6º: 
Esta selmana vamos entamar xugando a una sopa lletres rellacionada col proyectu nel que tamos trabayando:

SOPA LLETRES mesmos drechos

Cuando alcontréis toles palabres yá podéis pasar a la segunda parte... Debéis buscales nel diccionariu de la Academia de la Llingua Asturiana.
Escoyéis la definición que vos paeza más apropiada y escribísles, una a una, nuna fueya o nun testu word pa mandámeles por Teams o al corréu.
Con lo que me mandéis voi preparar un autodefiníu pa xugar la prósima selmana.

¡Ánimu, que ye perfácil!



Un abrazu na distancia... Mer 🌈