SELMANA del 18 de mayu
¡Bonos díes, llinguateres y llinguateros!
Esta selmana pasamos yá de la segunda metá del mes de mayu. ¡Cómo pasa'l tiempu...!
 |
| *Calendariu de "Imagina, Crea, Educa" |
¿Cómo tais? ¿Yá lleváis meyor la situación de tar en casa? La verdá ye que dende que podemos salir a dar una vuelta ye too muncho meyor, pero debemos ser prudentes al salir a la cai y nun fastidiala, agora, que lo tábamos faciendo tan bien.
Vamos entamar la selmana faciendo, TOES y TOOS, unes manualidaes, más concretamente, vamos trabayar l'arte xaponés "ORIGAMI", que de xuru qu'igual vos suena más si vos desplico que ye lo mesmo que dicir "papiroflexia". Pero si nun vos suena nenguna de les dos, yá vos lo cuento yo: Consiste en facer figurines doblando varies veces un papel.
Voi dexavos varies figures d'animales, sólo tenéis que siguir les instrucciones en caúna d'elles. Escoyéi cuál/cuáles vos gusten más o vos paecen más afayadices. Podéis facer toles que vos presten...
¡A por elloooo, yá vais ver qué chulada!
--------------------------------------------------------------------------------------------------------------
¡¡¡¡¡AVISU!!!!! La selmana que vien voi facevos un cuestionariu sobre la llectura "La mio hermana ye una mofeta", asina tenéis tiempu a terminala si nun lo ficisteis tovía.
--------------------------------------------------------------------------------------------------------------
TAREA pa 1º:
Vamos siguir col plan saludable qu'entamamos la selmana pasada. L'oxetivu d'esti plan ye deprender cosines que faigan que temos sanos y sanes. Esta selmana vamos trabayar sobre la fruta, un alimentu que debemos tener na nuesa dieta pa nun nos poner malos.
1) Fíxate na semeya y dime los nomes de les frutes que conoces.
2) ¿Cuál ye la fruta o frutes que más te gusten?
3) ¿Qué fruta probaste y nun te gustó muncho?
4) ¿En qué momentu del día comes fruta?
5) Dibuxa la to fruta o frutes preferíes.
TAREA pa 2º:
Esta selmana, amás de facer les manualidaes que vos despliqué enantes, vamos repasar cosines que deprendimos esti cursu.
1) Entamamos con un cantar, que de xuru vos vais alcordar. (Si vos sobrara tiempu y vos apetez, podéis facer un dibuxu de la casa de la vuesa güela -podéis escoyer cuál-. Digo casa, pisu, etc...).
2) Y dos fichines mui cencielles de repasu:
¡Ánimu que ye facilísimooo!
TAREA pa 3º:
Nes viesques asturianes viven munchos seres fantásticos, como la xana y el busgosu, pero tamién munchos animalinos tienen ellí la so casa... Ún d'ellos: l'osu.
 |
Mirái qué sustu llevó esti paisanu... Y cola cara bonu que tien l'osín.
1) Déxovos la lletra, LLETRA cantar y el CANTAR Un osu soi . Habéis d'escuchalu varies veces pa dir deprendiéndolu poquiñín a poco. Ye un cantar mui prestosu, yá vais ver...
TAREA pa 4º:Esta selmana vamos falar de los ríos asturianos. Pero enantes, vamos facer un repasín de les partes d'un ríu:El cursu ye'l recorríu que va dende'l so nacimientu hasta la desembocadura, que ye onde se mezcla col agua de la mar formando les ríes. N'Asturies hai delles perimportantes, como la de Navia, Avilés o Villaviciosa, pol ecosistema que formen.El cauce ye'l llugar per onde va'l ríu y el caudal, la cantidá d'agua que lleva.
1) Depués d'esti repasu, vamos ver un reportaxe sobre los ríos d'Asturies de la cadena pública asturiana, la TPA:
2) Y pa finar, tócavos una ficha mui cenciella. De xuru que vol alcordáis d'aquel mapa xigante d'Asturies qu'usamos en clas pa buscar diferentes sitios nél. Pues agora, vais tener que colocar los ríos siguiendo les instrucciones que vos dan. Y de regalu, unos colorinos...
¡Ánimu, que "ta tirao"!
TAREA pa 5º:Esta selmana vamos deprender un cantarín perguapu, del folclore asturianu, que se titula "Cuando te vi na fonte", interpretáu por Xentiquina. A min, personalmente, ye ún de los que más me gusten.
1) Pa deprendelu vamos entamar trabayando la lletra que tenéis na siguiente ficha. Nun tien sentíu deprender un cantar ensin saber lo que diz, asina que tamién vos dexo'l DICCIONARIU pa buscar delles pallabres.
2) Depués de lleela y tener claru'l significáu de toles pallabres, yá podéis resolver les cuestiones que se planteguen na fueya.
3) Y pa finar, déxovos el cantar: cantar CUANDO TE VI NA FONTE
¡Que vos preste!
TAREA pa 6º:Esta selmana vamos trabayar sobre 10 ilustraciones del periódicu El País:
Cuando les lleáis y analicéis, conozáis el vocabulariu, definiciones, etc... Yá vais tar preparaes y preparaos pa facer la tarea d'esta selmana:
- Escribir nuna fueya o grabar un audiu (depués de facer un esquema colo que queráis cuntar, de forma organizada) dando soluciones a toles cuestiones que se planteguen en caúna de les ilustraciones.
Imaxina que yes la presidenta o presidente del Gobiernu y tienes poder pa facer cambeos na nuesa sociedá y facer que seya más xusta y solidaria ente homes y muyeres.
¡Ánimu, a ver qué coses interesantes se t'ocurren!
Bona selmana y un abrazu na distancia... Mer
*Dalgunos materiales de 2º, 3º, 4º y 5º tán sacaos de los manuales de Llingua Asturiana de la Ed. VTP
Comentarios
Publicar un comentario