SELMANA del 11 de mayu
¡Bonos díes a toes y a toos! Vamos a por otra selmana...
Déxovos la fueya del calendariu pa organizavos. Tamos nel mes de mayu, el mes de les flores. ¡Que vos preste!
*Calendariu de "Imagina, Crea, Educa"
Como vos cunté na entrada anterior, la selmana pasada habría de festexase El Día de les Lletres Asturianes, pero col "bichu" per ehí rondando tuvo que posponese. Poro, voi proponevos a TOES y TOOS una llectura como primer tarea d'esta selmana.
Entrái nesti enllaz editorial PINTAR-PINTAR, pinchái na pestañina que trai "All" y vais llegar directamente a la sección de llibros escritos n'asturianu. Ellí buscái esti títulu:
"La mio hermana ye una mofeta".
De primeres pue sonavos un títulu quiciabes "infantilón" (dígolo polos neños y neñes más mayores...), pero de xuru que la mayoría conoz el casu del nacimientu d'un neñu o neña na familia o nel vecindariu... ¿A que sí?
TAREA pa 1º:
Vamos diseñar un plan saludable pa tar sanos y sanes.
Una de les coses importantes va ser "ximielgar el cuerpu" pa conseguir tar en forma y tener el corazón sanu. Déxovos equí una clas perinteresante pa facer exerciciu en familia. Yá vais ver qué prestoso... ¡Ahhh! Y si tenéis una capa per casa, nun olvidéis ponela pa entrenar colos nuesos amigos.
¿Alcuérdeste cómo se llamaben les comides principales del día n'asturianu?
A _ _ _ _ _ _ _
X _ _ _ _
M _ _ _ _ _ _ _
C _ _ _
Pues agora tócate cuntame qué ye lo que comes en caúna d'elles, un día cualesquier de la selmana. Déxote un organizador pa que escueyas un día y lu rellenes. ¡Ánimu, que ye perfácil!
TAREA pa 2º:
¿Alcordáisvos del cantar LLUEVE, nel que taben unos neños y neñes murnios y aburríos porque nun podíen salir al patiu a xugar?
Pues, como estos díes el tiempu nun acompaña y nun dexa de llover, nun pudi salir a la cai tol tiempu que quixere, poro ando un poco aburrida per casa...
Asina que, como segunda tarea, vais enseñame un xuegu al que vos preste xugar a vosotros.
Pero nun puede ser pa la tablet o l'ordenador porque los tengo ocupaos pa trabayar...😓
Podéis mandame un dibuxu con instrucciones, un audiu coles regles de cómo se xuega o lo que queráis...
¡A ver qué coses interesantes se vos ocurren pa entreteneme! Y gracies d'antemano... 💛
TAREA pa 3º:
Voi enseñavos un cantar que me presta muncho: Nun queremos dir al zoo del grupu POP PIQUIÑÍN (Petit Pop) nel qu'un grupu d'animalinos nos cuenten lo felices que son na so casa, la viesca, onde quieren que los dexen vivir en paz.
Nel vidiu podéis siguir la lletra col Karaoke pa saber qué nos quieren dicir y poder cantala con ellos. Yá sabéis lo cantarinos y cantarines que somos nesti grupu, asina qu'a practicar...
Como vos dicía, la lletra del cantar fala de la viesca, un sitiu pobláu d'árboles. ¿Yá t'alcuerdes de lo que ye entós, non? 🌳🌲🌳🌲🌳
Nes viesques asturianes viven dalgunos seres mitolóxicos que vimos esti cursu. Ún d'ellos, concretamente, dedicábase ente otres coses a guardar les ayalgues de los cuélebres y prestába-y vivir a la vera los ríos y les fontes... ¿Yá sabes de quién te toi falando? Hala, pues cuéntame quién ye, qué más coses sabes y mándame un dibuxu de cómo t'imaxines a esti ser.
TAREA pa 4º y 5º:
Mañana martes, día 12 de mayu, ye'l Día Internacional de la Enfermería:
Nestos tiempos que vivimos, el llabor de les enfermeres y enfermeros ye fundamental por munches razones.
Pero, ¿sabes esactamente qué ye lo que faen nel so trabayu?
Pues neso va consistir la segunda tarea de la selmana: investigar el llabor d'eses persones (a les qu'aplaudimos tolos díes a les ocho la tarde) nun hospital o centru médicu y, por ello, averiguar por qué son tan importantes.
Escríbemelo n'asturianu nuna fueya (y manda foto) o nel ordenador nun documentu word. Tien qu'ocupate ente 5 y 7 ringlones. ¡Hala, a investigar!
TAREA pa 6º:
La selmana pasada partísteis d'una sopa lletres pa buscar nel diccionariu la definición d'una riestra palabres rellacionaes col proyectu nel que tamos.
Agora colo que me mandasteis vais xugar a completar esti crucigrama:
Y pa finar déxovos unos curtios pa ver. Habéis d'escribime nuna fueya o ducumentu word qué te fizo sintir caún d'ellos (con un parrafín por vidiu ye bastante). Alcuérdate d'escribilo curiosino, razonando lo que quies cuntar y n'asturianu.
Comentarios
Publicar un comentario