SELMANA del 30 de marzu

¡Buenes! ¿Cómo seguimos? ¿Yá tenéis ganes de volver a clas? Yo tengo que confesar que vos echo muchu en falta, pero yá queda menos pa venos...😉

Esta selmana, enantes d'entamar coles tarees de cada grupu, prestábame recordavos toes eses precauciones importantes que tenemos que tomar pa cuidanos del bichu del coronavirus. 

1) Llavar les manes varies veces al día y polo menos durante 20 segundos (¿Alcordáisvos del "Cumpleaños feliz" que facíamos en clas?).

2) Nun tocar la cara.
3) Poner delantre la cara'l brazu, doblando'l codu, cuando tosamos o estornudemos.
4) Una bona dosis de paciencia...

¡Vamos allá! Entamamos esta nueva selmana, que comparte los meses de marzu y abril, con munches ganes. Amás yá sabéis qu'hubo cambiu d'hora, asina que col horariu de branu vamos tener más hores de lluz al día. ¡Otra bona noticia!

                                            DICCIONARIU ONLINE

               
TAREA PA 1º Y 2º:

Esta selmana voi proponevos varies cosines:

1) Dalgunos yá los conocéis, pero güei quiero presentavos a "Los Bolechas" una serie de dibuxos animaos n'asturianu onde Xuacu, Cloya, el bebé Tatá, Xabel, Olaya o el perrín Trasgu van enseñanos munches coses prestoses.

Agora vais entrar nesti enllaz onde tenéis el capítulu tituláu "El Tiburón" nel que Xuacu va gastar una broma a los sos amigos... Yá vais ver...

El tiburón (LOS BOLECHAS)

2) Una segunda tarea consiste en facer un dibuxu sobre lo que visteis. Nel dibuxu pueden salir los personaxes de "Los Bolechas"que queráis (habéis de pone-y el nome debaxo pa yo saber quién ye caún). 
Podéis escanealu o saca-y una foto col vuestru nome.

3) Pa terminar voi dexavos la lletra y la música de:  
El pitín (cantar de Nacho Fonseca, interpretáu por "Seliquín") pa que la deprendáis y podamos cantala cuando volvamos a clas.

Dir organizándovos faciendo un poco cada día. ¡Que vos preste!

TAREA PA 3º: 

¿Qué tal lleváis la llectura de "Páxines del Diariu de Simón"? ¿Ta prestándovos? Un día voi entrugavos dalguna cosina sobre esti llibru, asina que nun vos despistéis.

Pa esta selmana vamos repasar l'abecedariu asturianu. ¿Alcordáisvos de los nomes de les 24 lletres? Por si acasu avísovos qu'había tres un plizcu especiales: g (gue), x (xe), y (ye).

Tenéis na entrada de la selmana anterior un enllaz de la música cola que rapeábamos estes lletres. Buscáila y siguíi practicando. Si vos alcordáis facíamos varies versiones más lentes o rápides, a ver qué tal se vos sigue dando...

Pero amás de rapear, vais tener qu'usar la memoria pa facer la tarea d'esta selmana porque vais tener qu'escribir una palabra asturiana qu'entame con caúna de les lletres del alfabetu. 

Dicía lo de la memoria pa que penséis en tolos cantares y llectures que vamos viendo y les pallabres que fuimos deprendiendo.

Por exemplu (y éstes yá nun sirven pa la vuestra riestra):

Arañón

Bruxa

Celeste

D...

E...

F...   y asina hasta llegar a la Z

Yá sabéis, tenéis qu'organizavos según los deberes que tengáis d'otres asignatures y facer les coses ensin embaruyase. ¡Ánimu, que ta "chupao"!

TAREA PA 4º y 5º:

¡Holaaaa! ¿Cómo van les llectures que vos compartí'l vienres pasáu? ¡Avísovos! Nun vos despistéis y dir lleendo el llibru que vos tocó, poquiñín a poco, porque dientro un tiempu voi facevos dalguna entruga sobre él... 

Pero esta selmana tenéis otra misión... Tócavos facer un menú que vais ofrecer nel restaurante onde trabayáis de cocineros y cocineres. ¡Vais ser los "máster-chefs asturianos"!

Cuando vais a tomar dalgo con mami y papi, amigos y familia, en tolos chigres/bares, sidreríes, y restaurantes tienen  una especie de llibreta onde se pue ver qué comer o cenar. Por exemplu, puede apaecer organizao asina:

-Entraes/primeros platos:

ensalaes, sopes, cremes y purés, cocidos y too tipu d'entremeses y aperitivos, etc...

-Carnes: 

cachopu, entrecot, raxa, pitu caleya, hamburguesa, llacón, adobu, etc...

-Pescaos o pexes: 

mariscos, llubina, atún, bocartes, calamares, chipirones, chopa, xarda, pixín, etc...

-Postres o llambionaes: 

xelaos de frutes, tarta, frixuelos, compota, pastel, bizcochu, etc... 

Bono, como dicía, la tarea d'esta selmana consiste en facer un menú con:

1) una entrada o primer platu

2) una carne o pescáu  

3) un postre 

Y vais tener que cuntame, pasu a pasu, la receta de 1 d'esos tres platos del menú (el que mas te preste de los 3 qu'inventaste, dame igual).

Podéis aprovechar y pedir ayuda a quienes sepan de cocina na vuestra casa pa que vos echen una mano. 

Esta receta tien qu'ocupar ente 6 y 8 ringlones d'una fueya onde tenéis que dir desplicando pasu a pasu: ingredientes, técniques de cocinao, tiempos, trucos pa quede mas rico, etc... 

Tenéis que mandámela al mio corréu: mer.llingua.xove@gmail.com

¡IMPORTANTE! Tien que tar escrito n'asturianu, clarooooo, que se vos olvida. Fixáivos nos verbos, nomes y axetivos que vayáis usando y tolo que fuimos deprendiendo en clas pa usalo na receta.

Déxovos un vídeo d'otra receta muiiiii especial fecha por una antigua alumna mía...

RECETA ESPECIAL

¡¡¡Y queda pendiente (pa lxs de 5º) la tarea de la selmana pasada de Xovellanos por problemes técnicos. Yá tendréis noticies...!!!

Dir organizándo'l tiempu coles demás asignatures y nun tengáis priesa, vamos facer les coses tranquilamente pa que queden perbién. ¡Ánimu!

TAREA PA 6º:

Como comenté tamién a los compañeros y compañeres de 5º cursu, que compartíen con vos la tarea de la selmana pasada, queda pendiente'l test de Xovellanos por problemes técnicos. Yá voi buscar la manera de facelo. Tendréis noticies.

Y nun vos despistéis cola llectura que vos propuse la selmana pasada... Dir poco a poco, pero nun dexéis de facelo.

Pa esta selmana vamos repasar un tema que vimos enantes de dexar les clases presenciales: LOS VERBOS.

LOS VERBOS

Pinchái nel enllaz onde vais ver una tabla mui completa, pa terminar con unos exercicios. Habéis d'escribime pa cuntame cuántos aciertos tuvisteis.

Y pa finar voi dexavos cola versión karaoke del cantar popular asturianu "El Chalaneru", interpretáu polos hermanos Tejedor.

Trátase d'una de les canciones más conocíes del cancioneru asturianu. El chalaneru yera quien manexaba la chalana, una embarcación pequeñina de madera que servía pa cruzar el ríu d'un llau a otru. Nesti cantar refierse al ríu Nalón.

Pa mas información, el tercer sábadu d'agostu festéxase, tolos años, el Descensu Folclóricu del Nalón onde s'entona esti cantar enantes de la folixa. Asina que deberíes dir deprendiéndola si pienses pasar per ellí.

Cantar EL CHALANERU (hermanos Tejedor)

Cuando volvamos a clas vamos cantala y baillala. ¡Bona selmana!

Un abrazu na distancia...