LLECTURES

¡Holaaaaa! ¿Qué tal va too?

Güei vuelvo a asomame per equí p'animavos a lleer un poco... De xemes en cuando voi facevos dalguna propuesta de llectura pa seguir deprendiendo y practicando la nuesa llingua.

¡IMPORTANTE! Na portada del blog vais alcontrar un enllaz llamáu ACADEMIA DE LA LLINGUA ASTURIANA. Ehí tenéis un diccionariu online pa buscar toles pallabres que necesitéis.

Estos díes tenemos la suerte de que varies editoriales nos "regalen" dalgunes llectures online pa disfrutar dende la tablet o l'ordenador, asina que vamos aprovechalo. Nesti casu trátase de la Editorial PINTAR-PINTAR. 

Cuentos Editorial PINTAR-PINTAR

Pinchando ehí podéis ver TOLOS llibros que nos ofrecen escritos en llingua castellana y llingua asturiana. 

Pa poder ver los que vos propongo, tenéis que pinchar nel triangulín (v) y va apaecer la opción de los llibros asturianos. De los doce cuentos que vais alcontrar vamos fixanos en tres:

-Pa 1º y 2º cursu: DEVA Y EL PITÍN

Esta hestoria fala del pitín Manolín y les aventures que vive'l día que se perdió nuna viesca... ¿Suénavos?

Nesta aventura va alcontrase con otros animalinos que van querer ayudalu, pero tamién con otros que lu quieren fastidiar.

¿Quies saber cómo acaba esta hestoria del pitín Manolín y si pudo volver a casa? Pues anímate a lleer esti cuentu tan preciosu.

-Pa 3º y 4º cursu: PÁXINES DEL DIARIU DE SIMÓN

"Por fin tengo un diariu..." Así entama esta hestoria que Simón, el nuesu protagonista escribe nes páxines del so diariu. Nél fálanos de la profe Amparo, del so compañeru de mesa, Héctor, que como él diz ye "súper especial", tamién d'a lo que xueguen nel recréu o de qué ye lo que ta lleendo nesos momentos, ¿suénavos Harry Potter?... 

Pues si quies conocer meyor a Simón y toles coses que-y pasen, anímote a siguir descubriendo'l cuentu: "Páxines del diariu de Simón".

- Pa 5º y 6º cursu: MITOS D'ASTURIES

De xuru que conoces a dalgunos d'esos seres fantásticos que llamamos mitolóxicos: la Xana, el Trasgu, el Cuélebre. Pero si te falara de los Chupasangres, el Pataricu o los Esplumeros,...¿Sabríes cuntar dalgo d'ellos? ¿Cómo son, por qué se ficieron famosos, si son nobles o malucos...?

Convídote a que sigas investigando sobre toos estos seres que vivieron y, dalgunos dicen, que siguen viviendo ente nós... ¡Avisu! Dalguno da un poco mieu...

¡Que vos presten! Un abrazu na distancia...